Монгол Улсад байт харвааны анхны том талбайг Үндэсний цэцэрлэгт хүрээлэнд байгуулжээ. Байт харвааны “360” талбайг нээх ёслол өчигдөр болсон бөгөөд Ерөнхийлөгч Х.Баттулга оролцож, үг хэлсэн юм. “360 градус” төслийг Монголын байт харвааны холбооны Ерөнхийлөгч П.Цагаан санаачилсан бөгөөд Монголын байт харвааны холбооны Удирдах зөвлөлийн гишүүн С.Эрдэнэболд удирдан гүйцэтгэсэн бөгөөд иргэд, ААН-үүдийн хандивын тусламжаар 60 хоногт багтаан барьжээ. Ингэснээр Монголд 1960 оноос хөгжиж эхэлсэн ч өнөөг хүртэл зориулалтын талбайгүй байсан тамирчид стандартад нийцсэн талбайд бэлтгэл хийх боломж бүрдэж байна.

Тухайлбал, хүйтний улиралд дотор талбайд бэлтгэл хийх бол нарны эрчим хүч ашиглан гэрэлтүүлгийг шийдсэн тул шөнийн харваа хийх ч боломж бүрджээ. Түүнчлэн олон улсын тив дэлхийн чанартай ямар ч тэмцээн зохион байгуулах бүрэн чадвартай олон улсын стандартад нийцсэн байгууламж гэдгээрээ онцлог аж. “Дайчин чанар-Тэсвэрийн талбар” гэж нэрлэсэн энэхүү талбай Цэцэрлэгт хүрээлэнд байгуулагдаж байгаа учир хүүхэд залуус нээлттэй ирж сонирхох, хичээллэх боломжтой юм байна. “360” талбай дахь 58 мертрийн урт, долоон метрийн өргөнтэй байнгын бэлтгэлийн саравчийг байт харваан тамирчид өөрсдөө хийжээ.

Тус талбайд хамгийн холдоо 90 метрт харвах, хамгийн олуулаа буюу 32 хүн зэрэг харвах боломжтой гээд олон давуу талтайг тамирчид онцоллоо.

Мөн талбайд Гиннесийн номд бичигдэхүйц том буюу 27*13 метр хэмжээтэй олимпийн цагариг босгож байгаа нь байт харвааны төрлөөр Монгол Улс олимпийн медальтай болохыг билэгшээж байгаа аж. Энэ цагираг сүндэрлэсэнээр тамирчдын сэтгэл зүйд асар өндөр нөлөө үзүүлнэ хэмээн үзэж байна.

Монгол Улсын Ерөнхийлөгч Х.Баттулга байт харвааны талбайн нээлтийн ёслолд оролцохдоо:

Монгол Улсад орчин үеийн байт харвааны спорт үүсч хөгжсөн 58 жилийн түүхийн хуудаснаа нэгэн шинэ хуудас болон нээгдэж буй үйл явдалд оролцохоор Та бид энд цуглаад байна.

Дэлхийн зэвсэг техникийн хөгжилд композит нум буюу эвэр нумыг монголчууд анхлан зохион бүтээж, хэрэглээнд орлуулсан гэж тэмдэглэгдсэн байдаг. Сур харвааг үндэсний уламжал, хэрэглээ болгож байсан үндэстний хувьд байт харвааны спортыг хөгжүүлснээр Монголын анхны Дэлхийн аварга, Паралимпын аварга энэ спортоос төрж байсан билээ. Аливаа спортоор өндөр амжилт гаргахад гурван суурь нөхцөл шаардлагатай байдаг гэж судлаачид хэлдэг.

Энэ нь:

уламжлал
сургалт
авьяастан гурав юм.

Байт харвааны спортыг хөгжүүлэх энэ суурь нөхцлүүдээс сургалт нь ихээхэн доголдож явсныг өнөөдөр спортод элэгтэй, зүрх сэтгэлтэй хүмүүсийн ачаар нөхөж байна. Энэхүү талбайг бий болгохын төлөө сэтгэл оюун, зүтгэл, хандиваа зориулсан бүх хүмүүст дахин дахин талархал илэрхийлье.

Байт харваачид анх удаа олон улсын стандартад бүрэн нийцсэн, байгаль орчинд ээлтэй шийдэл бүхий бэлтгэл сургуулилт, тэмцээний талбайтай боллоо. Бүтээн байгуулалтын ажилд ахмадын туршлага, идэрчүүдийн зүтгэл, залуусын тэмүүллийг уялдуулан холбож, мэдлэг туршлагаа солилцон, бие биеэ дэмжсэн зохион байгуулалт, менежтентээр асар богино хугацаанд барьж, өнөөдөр нээлтээ хийж байна. Олон нийтийг хоёр сарын турш идэвхжүүлж, урмыг бадраан, сайн сайхан зүйлд уриалан дуудсаар байт харвааны “360” талбай сүндэрлэн бослоо.

Бүтээн байгуулалтын ажлыг санаачлан, гардан удирдсан Монголын байт харвааны холбооны Ерөнхийлөгч Пунцагийн Цагаан, Удирдах зөвлөлийн гишүүн Сүхбаатарын Эрдэнэболд нар болон бүтээн байгуулалтад оролцсон, дэмжсэн бүх хүмүүст халуун талархал дэвшүүлье.

Монголчуудын хамтын зүтгэл, нэгдмэл сэтгэлээр боссон энэ талбайгаас тив, дэлхий, Олимпын аваргууд төрөн гарч, улсынхаа нэрийг өндөрт өргөн, төрийн далбаагаа мандуулж, төрийн дууллаа аялгуулахын өлзийтэй ерөөлийг дэвшүүлье.

Буянт үйлс бүтээхийн сэрүүн гэрлээр бүрнээ тусыг хүргэн амжилт дуудах болтугай” гэсэн юм.

Монгол Улсын Ерөнхийлөгч Х.Баттулга үг хэлснийхээ дараа байт харвааны “360” талбайн бүтээн байгуулалтын ажилтай танилцав.

Хариулт үлдээх

Your email address will not be published. Required fields are marked *

Post comment